Kremlini akuzoi të premten autoritetet ukrainase se po luanin me zjarrin, një ditë pasi forcat ruse thanë se kishin kapur një dron ukrainas pranë centralit bërthamor të Kurskut dhe disa media raportuan se një zjarr kishte shpërthyer disa kilometra larg tij. "Kievi po vazhdon të luajë me zjarrin dhe ne natyrisht do t'i tërheqim vëmendjen për këtë, përfaqësuesve të Agjencisë ndërkombëtare bërthamore," u tha gazetarëve zëdhënësi i Kremlinit Dmitry Peskov, duke iu referuar mbikëqyrësit bërthamor të OKB-së. Zëdhënësi i Ministrisë së Jashtme të Ukrainës, Heorhiy Tykhyi, mohoi ndërkohë një ditë më parë se Ukraina kishte hapur zjarr në ose afër uzinës. Forcat ukrainase hynë në rajonin e Kurskut në një inkursion të befasishëm ndërkufitar më 6 gusht dhe mbeten atje edhe pse ushtria ruse përpiqet t'i zbrapsë ato. Moska tha se kishte rrëzuar një dron ukrainas të enjten, pranë qytetit rus Kurchatov, por nuk pati dëme në centralin e kurskut. Guvernatori rajonal, Aleksei Smirnov, tha se mbetjet e dronit shkaktuan shpërthim në një ndërtesë që nuk kishte lidhje me uzinën. Disa kanale ruse në Telegram raportuan për sulmin e supozuar ukrainas, për të cilin thanë se ishte penguar nga mbrojtja ajrore, por që kishte rezultuar në një zjarr disa km larg centralit bërthamor. Operatori i uzinës, Rosenergoatom, tha se objekti po funksiononte si zakonisht dhe nivelet e rrezatimit mbetën brenda kufijve normalë.