Situata në Sloviansk dhe Kramatorsk është bërë aq e rrezikshme, saqë policia thotë se ka ardhur koha që civilët të largohen. Dy qytetet fqinje me njëra-tjetrën janë më të mëdhatë që mbeten ende nën kontrollin e plotë ukrainas në rajonin lindor të Donbasit. Në zonat më të prekura, evakuimet e detyruara të familjeve me fëmijë tashmë kanë filluar, thonë autoritetet ukrainase. Të dy qytetet po vuajnë këto ditë bombardime të shpeshta, që nuk shënjestrojnë vetëm objektiva ushtarake, por edhe infrastrukturën civile, që nga rrjeti i energjisë, ai ujësjellës deri te shkollat, kopshtet dhe çerdhet. Ekspertët vlerësojnë se sulmet janë taktikë ruse për të dëbuar civilët dhe përgatitur terrenin për një ofensivë madhore tokësore dhe ajrore me qëllim marrjen nën kontroll të dy qyteteve. Rënia e tyre do t’i jepte Moskës kontrollin e plotë të rajonit të Donbasit, që konsiderohet si hambari ukrainas i mineraleve të çmuara.