Rusia tha të dielën se ka testuar me sukses një raketë balistike ndërkontinentale, me kapacitet për të mbajtur mbushje bërthamore. Testimi i raketës “Bulava”, i pari në vitin e fundit, vjen pasi Rusia ka ashpërsuar retorikën e saj bërthamore, që pas revokimit të ratifikimit të një traktati që ndalon testimet bërthamore. “Nëndetësja e re Perandori Aleksandri i Tretë, me raketa strategjike dhe kapacitet bërthamor, ka lëshuar me sukses raketën balistike interkontinentale Bulava”, tha Ministria ruse e Mbrojtjes. Autoritetet ruse bënë të ditur se e kishin lëshuar raketën nënujore prej një pike të panjohur në Detin e Bardhë, drejt një shënjestre mijëra kilometra larg në Gadishullin Kamçatka. “Raketa u nis në kushte normale prej ujit dhe mbushjet e raketave arritën në zonën e shënejstruar, sipas afateve të përcaktuara”. Raketa 12-metërshe Bulava është dizajnuar për të përforcuar kapacitetet bërthamore të Rusisë dhe besohet se ka një rreze veprimi prej 8.000 kilometrash.