Ushtria ruse sulmoi me dronë kryeqytetin e Ukrainës, Kiev, të premten në mëngjes, duke plagosur dy persona dhe duke shkaktuar dëme në prona. Ky ishte sulmi i gjashtë i tillë në kryeqytetin ukrainas këtë muaj dhe pjesë e një tufe të madhe dronësh të cilët i goditën pjesë të Ukrainës qendrore, jugore dhe perëndimore, thanë forcat ajrore ukrainase. Mbrojtja ajrore e Ukrainës tha se rrëzoi 24 prej 28 dronëve të lëshuar nga trupat e Moskës. Kryebashkiaku i Kievit, Vitali Klitschko, shkroi në Telegram se një dron kishte goditur një ndërtesë banimi në lagjen periferike Solomianski, në jug të qendrës së qytetit, duke shkaktuar zjarr në katet e sipërme të saj. Zjarri u shua shumë shpejt, sipas tij. Shërbimet e emergjencave thanë se disa banesa u dëmtuan në katet 24, 25 dhe 26 të ndërtesës së lartë. Dy persona u lënduan, një prej të cilëve është duke u mjekuar në spital. Incidenti ndodhi qindra metra larg një materniteti. Klitschko tha, po ashtu, se copat e dronëve i vunë zjarrin një shtëpie që po ndërtohej në Darnitski, në bregun lindor të lumin Dniepër. Ai tha se nuk kishte të lënduar atje. Serhiy Popko, shef i administratës ushtarake të Kievit, raportoi në anën tjetër se copat e dronëve të rrëzuar ranë mbi një ndërtesë banimi në Holosivski, në jug të qendrës së qytetit.