Volodymyr Zelenski tha të dielën se Rusia po përgatitet të kryejë sulme kundër centraleve bërthamore të Ukrainës, në një përpjekje për ta ngrirë Kievin dhe për ta detyruar atë të nënshtrohet duke tronditur rrjetin e tij të energjisë. Presidenti ukrainas thotë se sulmet ruse janë intensifikuar javët e fundit dhe po synojnë gjithnjë e më shumë centralet e energjisë, në një përpjekje për të rritur drejtpërdrejt vuajtjet e civilëve, në mes të dimrit. Sulmet e përsëritura po shkaktojnë ndërprerje të energjisë në rajone të shumta, me mijëra shtëpi që humbasin aksesin në gaz dhe energji elektrike në sulmet e përditshme. "Situata në sistemin e energjisë mbetet e vështirë, por ne po bëjmë gjithçka që mundemi për të rikthyer të gjitha shërbimet sa më shpejt të jetë e mundur", shkroi Zelenski në një postim në X. Ai tha se moska nuk dëshiron ti japë fund luftës pavarësisht përpjekjeve të vazhdueshme për paqe, të udhëhequra nga Shtetet e Bashkuara, ndërsa lufta i afrohet vitit të saj të pestë. “Mbrëmë, mbi 200 dronë sulmues u nisën kundër nesh. Rajonet Sumy, Kharkiv, Dnipro, Zaporizhzhia, Khmelnytskyi dhe Odesa u sulmuan. Dhjetëra njerëz janë plagosur, përfshirë një fëmijë. Deri tani, dy persona janë raportuar të vrarë”, tha Zelenski. Sulmet ruse gjatë natës kanë patur intensitet të lartë në javët e fundit, me breshëritë që po bëhen më të mëdha dhe llojin e armëve të përdorura që po bëhen më të forta, duke shkaktuar më shumë dëme në objektivat që Kievi thotë se janë kryesisht civile. Zelenski thotë se vetëm këtë javë më shumë se 1,300 sulme me dronë, mbi 1,000 bomba ajrore të drejtuara dhe dhjetëra sulme me raketa të llojeve të ndryshme, duke përfshirë predha balistike vdekjeprurëse, janë lëshuar mbi ukrainë. Ai u bëri thirrje aleatëve të rrisin mbështetjen për Kievin që të vazhdojë të ndërtojë mbrojtjen e tij për t'i bërë ballë sulmeve të vazhdueshme ruse dhe për të mbrojtur jetën e civilëve të pafajshëm.