Rusia ka nisur pushtimin e Ukrainës gati një vit më parë por duket se nuk do të ndalet me kaq. Ministri i punëve të Jashtme të Rusisë, Sergey Lavrov la të kuptohet së fundmi se Moldavia mund të bëhet viktima e radhës e agresionit rus. “Tani po analizojmë rolin tonë në Moldavi”, u përgjigj Lavrov të enjten, kur një gazetare ruse e pyeti se a do të ketë objektiva të reja shtetit rus. Kujtojmë se Rusia tashmë ka rrëmbyer një pjesë të territorit moldav, ku ka mijëra trupa gjenden në rajonin e Transnistrisë, e cila ka shpallur pavarësinë e njëanshme në vitin 1990. Moldavia, e cila është në gjendje të jashtëzakonshme që nga 24 shkurti 2022, ditë kur Rusia pushtoi Ukrainën, e zgjati situatën e emergjencës me 60 ditë, në 6 dhjetor të vitit të kaluar. Kreu i Shërbimit moldav të Informacionit dhe Sigurisë (SIS), Alexandru Musteata, paralajmëroi më 19 dhjetor se Rusia mund të sulmojë territorin moldav në fillim të vitit 2023, në varësi të situatës së ofensivës në Ukrainë.