Avionët luftarakë të NATO-s u ngritën në fluturim pranë kufirit lindor të Polonisë të hënën, ndërsa Ukraina u godit nga një sulm rus me raketa dhe dronë. Forcat e Armatosura të Polonisë thanë se avionët polakë dhe ata aleatë ishin ngritur në fluturim në mes të "aktivitetit të ripërtërirë të aviacionit me rreze të gjatë veprimi të Federatës Ruse që kreu sulme me raketa mbi objektet e vendosura në territorin e Ukrainës". "Të gjitha procedurat e nevojshme për të garantuar sigurinë e hapësirës ajrore polake janë aktivizuar", thanë forcat e armatosura polake në një deklaratë në X. "Komanda Operacionale e Forcave të Armatosura Polake po monitoron situatën aktuale, me forcat dhe burimet në varësi që mbeten në gatishmëri të plotë për reagim të menjëhershëm". Në orët e para të së hënës, zyrtarët ukrainas thanë se Rusia kishte nisur një valë të re sulmesh në të gjithë vendin ndërkohë që raketat dhe dronët rusë goditën qytete ukrainase me zjarr vdekjeprurës gjatë fundjavës. Të paktënm 13 viktima u raportuan të dielën, mes të cilëve edhe tre të mitur të moshës 8, 12 dhe 17 vjeç, në rajonin veriperëndimor të Zhitomirit, larg vijave të frontit. Por, kryeqyteti, Kievi, dukej se ishte objektivi kryesor i sulmeve të fundit, ndonëse edhe qytete të tjera u përballën me sulme ajrore.