Autoritetet finlandeze po punojnë për të forcuar kufirin me rusinë, për shkak të frikës se një numër i madh azilkërkuesish, pjesë e asaj që helsinki e sheh si një luftë hibride që po zhvillohet nga rusia kundër perëndimit, mund të dyndet shpejt atje. Vendi po vendos më shumë patrulla kufitare, dronë dhe detektorë elektronikë dhe po ndërton gardhe përgjatë pjesëve të kufirit. Në Helsinki, parlamenti pritet të miratojë përpara pushimeve verore një legjislacion të ri, më të ashpër, që kritikët thonë se do të shkelë angazhimet e vendit për të drejtat e njeriut. Në fund të vitit të kaluar Finlanda mbylli të gjitha pikat e kalimit për udhëtarët përgjatë kufirit të saj prej 1,340 km me Rusinë për një kohë të pacaktuar pasi rreth 1,300 emigrantë nga vende të tilla si Siria dhe Somalia mbërritën përmes kësaj rruge. Që atëherë, vetëm disa dhjetëra azilkërkues kanë kaluar kufirin shumë të pyllëzuar në Finlandë, por Helsinki beson se Kremlini është i gatshëm të dërgojë më shumë emigrantë në çdo kohë, diçka që Moska e ka mohuar me forcë. Sipas legjislacionit të ri, rojat kufitare finlandeze do të jenë në gjendje të thërrasin mijëra rezervistë për të ndihmuar në patrullimin e kufirit, për të zbuluar sinjalet telefonike të migrantëve, për t'i dërguar emigrantët në qendrat e paraburgimit dhe - më e diskutueshmja - për t'i shtyrë ata në Rusi pa pranimin e shqyrtimin e kërkesave të tyre për azil. “Finlanda nuk mund të lejojë hapjen e një rruge të re për emigrantët në Evropë”, tha për Reuters Ministrja e Brendshme finlandeze Mari Rantanen. “Por kjo nuk ka të bëjë vetëm me një rrugë emigrantësh: kjo ka të bëjë me një situatë në të cilën autoritetet e një vendi tjetër po ndihmojnë apo edhe po i shtyjnë emigrantët drejt kufirit të Finlandës”, tha Rantanen. Marrëdhëniet me Moskën, dikur relativisht të përzemërta, janë përkeqësuar ndjeshëm që nga vendimi i Finlandës për t'u bashkuar me NATO-n pas pushtimit rus të Ukrainës më 24 shkurt 2022.