Kryeministrja daneze Mette Frederiksen tha se nuk mund të përjashtojë mundësinë që Rusia të jetë pas ndërhyrjes në aeroportin e Kopenhagenit, i cili ui mbyll për shkak të disa dronëve që fluturuan në zonë, duke e quajtur atë një “sulm serioz” ndaj infrastrukturës kritike të aleatit të NATO-s. Frederiksen përmendi një incident të ngjashëm me dron që preku gjithashtu aeroportin e Oslos në Norvegji, të hënën, dhe shkeljet e fundit të hapësirës ajrore polake, estoneze dhe rumune. “Duhet patjetër të shihet në kontekstin e gjithçkaje tjetër që po ndodh në Evropë, pa dalë në përfundime ende”, tha Frederiksen. Ambasadori i Rusisë në Danimarkë, Vladimir Barbin, tha në një deklaratë se dyshimet për përfshirjen ruse janë “të pabaza”, duke shtuar se “Rusia nuk është e interesuar për përshkallëzimin e mëtejshëm të tensionit në Evropë, gjë që mund të ketë pasoja të paparashikueshme”. "Incidenti në qiellin mbi Aeroportin e Kopenhagenit zbulon një dëshirë të qartë për të provokuar vendet e NATO-s që ato të hyjnë në një konfrontim të drejtpërdrejtë ushtarak me Rusinë. Është e papranueshme të kënaqesh me këtë," tha Barbin. Rusia ka thënë se aleatët e NATO-s nuk kanë ofruar prova të mjaftueshme se mjetet fluturuese të Moskës kanë kryer shkelje të hapësirës ajrore. Por NATO thotë se Rusia po teston aftësinë e saj për t'u përgjigjur dhe vendosmërinë e aleatëve të saj në një seri provokimesh të qëllimshme që lidhen me mbështetjen e vazhdueshme të aleancës për Ukrainën.