Deputetët ukrainas u këshilluan të shmangin ambientet qeveritare të premten, ndërsa Parlamenti anuloi seancën për shkak të paralajmërimeve për sulme të mundshme ajrore. Deputeti Taras Batenko foli për kërcënimin gjatë një transmetimi të drejtpërdrejt në kanalin “Hovoryt Velykiy Lviv” të enjten. “Ne jemi njoftuar për rrezikun e një sulmi raketor në Verkhovna Rada në Kiev në ditët në vijim. Putin ka rritur jashtëzakonisht shumë rrezikun. Seanca e nesërme është anuluar”, tha ai. Deputetë të tjerë konfirmuan po ashtu se seanca e së premtes është anuluar. Deputeti Oleksiy Honcharenko shkroi në Telegram se seanca e radhës është caktuar të mbahet më 22 dhjetor. Liderët e Parlamentit nuk kanë bërë ende komente zyrtare mbi këto paralajmërime. Zyra e presidentit e njoftoi publikun se do të vazhdojë punën “si zakonisht” të premten. Ky zhvillim vjen një ditë pasi presidenti rus, Vladimir Putin, njoftoi se ushtria ruse kishte "testuar me sukses në luftime" një raketë të re balistike me rreze të mesme veprimi, Oreshnik. Putin pretendoi se raketa u përdor në një sulm ndaj qytetit lindor të Ukrainës, Dnipro, duke pohuar se ishte përgjigje ndaj "veprimeve agresive" të NATO-s dhe përdorimit të raketave perëndimore nga Ukraina për sulme brenda tokës ruse. Forcat Ajrore të Ukrainës raportuan për sulme të shumta me raketa në Dnipro të enjten, përfshirë përdorimin e asaj që, sipas tyre, ishte raketë balistike ndërkontinentale. Kievi është në tension prej ditësh, në mesin e sulmeve intensive nga Rusia në të gjithë Ukrainën. Ambasada amerikane në Ukrainë paralajmëroi për një sulm ajror të madh rus dy ditë më parë dhe mbylli përkohësisht selinë e saj në Kiev. Ambasadat e Spanjës, Italisë dhe Greqisë gjithashtu pezulluan shërbimet për atë ditë. Spekulime për sulme të mundshme me raketa balistike RS-26 Rubezh nga rajoni Astrakhan i Rusisë qarkulluan në rrjetet sociale, megjithëse nuk u konfirmua nëse është kryer ndonjë sulm i tillë.