Ministria ruse e mbrojtjes e Rusisë tha se forcat ukrainase kishin lëshuar katër raketa ATACMS të prodhuara në SHBA mbi qytetin jugor rus të Voronezhit në një përpjekje për sulm ndaj objektivave civilë. Ushtria e Ukrainës tha se kishte sulmuar objektiva ushtarake në Rusi me raketat ATACMS, duke e quajtur këtë një "zhvillim të rëndësishëm". Kievi i mori sistemet në vitin 2023, por fillimisht ishte i kufizuar t'i përdorte ato vetëm në territoret e veta, gati një e pesta e të cilave kontrollohen nga Rusia. "Ekipet ruse të mbrojtjes ajrore S-400 dhe sistemet raketore dhe të armëve Pantsir rrëzuan të gjitha raketat ATACMS", tha ministria ruse e mbrojtjes në Telegram. Mbetjet që binin nga raketat e shkatërruara dëmtuan çatitë e një shtëpie pleqsh në Voronezh dhe një jetimoreje, si dhe një shtëpi, tha ministria duke shtuar se nuk kishte viktima ose të plagosur midis civilëve. Ministria publikoi foto të copave të raketave dhe tha se forcat e zbulimit ajror identifikuan rajonin e Kharkiv si vendi i lëshimit të ATACMS.