Tendat, kapanonet e avionëve dhe depot për automjetet ushtarake tregojnë prani të shtuar ruse pranë njërit prej anëtarëve më të rinj të NATO-s. Forcat ruse kanë forcuar bazat dhe kanë ndërtuar infrastrukturë ushtarake pranë kufirit finlandez, sipas imazheve të fundit satelitore, në një lëvizje që mund të zbulojnë strategjinë e tyre për atë që do të ndodhë pas luftës në Ukrainë. Imazhet, të konfirmuara nga zyrtarët e NATO-s, tregojnë tendat e reja, depot dhe rinovimet e bunkerëve si edhe një aktivitet të vazhdueshëm ndërtimi në një bazë helikopterësh që ka qenë kryesisht e papërdorur dhe e mbuluar me bimësi më parë. Deri më tani, punimet duket se janë në fazat e hershme të një zgjerimi më të madh dhe afatgjatë, dhe zyrtarët e NATO-s thonë se kjo nuk është aspak e ngjashme me grumbullimin përgjatë kufirit të Ukrainës para pushtimit në shkallë të plotë të Rusisë në vitin 2022. Për momentin, Rusia, e shqeësuar me luftën e saj në Ukrainë, ka shumë pak trupa përgjatë kufirit, dhe finlandezët këmbëngulin se asnjë nga këto zhvillime nuk përbën ende ndonjë kërcënim të madh. Por Finlanda është një nga anëtarët më të rinj të NATO-s dhe lëvizjet pa dyshim pasqyrojnë perceptimin e Moskës për një kërcënim: Ky kufi prej 1300 kilometrash është tani vija më e gjatë e kontaktit të aleancës perëndimore me Rusinë. Analistët ushtarakë parashikojnë se ai mund të kthehet në një pikë e nxehtë, veçanërisht me pjesën më të madhe të tij që shtrihet në Rrethin e Arktikut. Trupat amerikane dhe finlandeze zhvilluan kohët e fundit stërvitje ushtarake në Arktik me qindra trupa që vepronin nëpër pyje përballë një armiku hipotetik për momentin, që është Rusia. Zyrtarët finlandezë të mbrojtjes parashikojnë se nëse faza me intensitet të lartë e luftës në Ukrainë mbaron Rusia do të rivendosë mijëra trupa në kufirin finlandez. Dhe ata kanë rreth pesë vjet kohë para se Rusia të mund t’i ngrejë forcat e saj në nivele kërcënuese. Por ata janë të bindur se kjo do të ndodhë dhe se numri i trupave ruse që do të kenë përballë do të trefishohet.