Ndikimi rus në Shqipëri është më i vakët në krahasim me vendet e rajonit, megjithatë aktiviteti malinj i Moskës është i pranishëm kryesisht përmes lajmeve të rreme dhe keqinformuese që shpërndahen edhe përmes portaleve që dyshohet se financohen nga Rusia. Ministri i Brendshëm, Ervin Hoxha raportoi këtë të mërkurë në Komisionin kundër dezinformimit, drejtuar nga deputeti socialist, Erion Braçe. Ai tha se propaganda ruse në Shqipëri nuk vjen direkt nga Moska, por shpërndahet përmes ‘satelitëve’ të saj në Ballkanin Perëndimor. “Rusia ka shtuar prezencën dhe ndikimin në rajon duke kundërshtuar dhe vonuar procesin e integrimit europian të këtyre vende përmes influencës politike por edhe ekonomike. Pranohet se propaganda politike e Moskës nuk vjen direkt nga Moska, por vjen e ripaketuar në të njëjtën mënyrë si të vinte nga andej dhe shpërndahet përmes satelitëve të saj në rajon. 90 për qind e kësaj propagande ruse bëhen në gjuhën serbe. Shqipëria është më pak e prekur dhe më pak e ndikuar nga kjo fushatë hibride e Rusisë dhe satelitëve të saj në rajon. Kohët e fundit vlerësohet se infrastrukturës dezinformuese ruse në rajon i janë shtuar portale edhe në gjuhen shqipe, vazhdojnë të kenë shikueshmëri dhe lejueshmëri të kufizuar dhe numër të vogël klikimesh” Komisioni kundër dezinformimit është nismë e socialistëve të cilën opozita e ka bojkotuar.