Ukraina ka urdhëruar evakuimin e Pokrovskut, një qytet në rajonin e Donetskut, ndërsa forcat ruse i afrohen rajonit. Në një postim në Telegram, kreu i administratës ushtarake të qytetit thotë se është e rëndësishme që banorët të "mos vonojnë" evakuimin e tyre, pasi trupat ruse "po afrohen me shpejtësi në periferi të Pokrovskut". Qyteti ishte në fokus të lutimeve më intensive të këtyre ditëve të fundit. Ndërkohë, forcat ruse thanë se kanë marrë nën kontroll fshatin Serhiivka në rajon. Ukraina thotë se marrja nën kontroll e Donetskut është një prioritet për Moskën. Volodymyr Zelenskyy kishte paralajmëruar një ditë më parë se Pokrovsku dhe qytete të tjera rreth tij po përballeshin me sulmet më intensive ruse. Analistët në Institutin për Studimin e Luftës thanë se forcat ruse po ruanin një "ritëm sulmues relativisht të lartë" në Donetsk pasi Moska "i jep përparësi përparimeve në lindje të Ukrainës" pavarësisht presionit të pushtimit ukrainas të Kurskut. Paraditen e të premtes, alarmet për sulme ajrore kanë jehuar në shumicën e rajoneve ukrainase. Më herët, më shumë se gjysma e vendit ishte nën alarm për sulme të mundshme me raketa balistike. Agjencia e lajmeve reuters raporton se sulmet ruse në rajonin lindor të Donetskut kanë vrarë tre civilë dhe kanë plagosur pesë të tjerë në 24 orët e fundit.