Tetë persona, përfshirë një fëmijë, janë vrarë si pasojë e një sulmi me dronë që Rusia kreu gjatë natës në rajonin verilindor të Ukrainës, Sumi, tha të martën presidenti ukrainas Volodymyr Zelensky. “Çdo sulm i ri rus vetëm konfirmon qëllimin e vërtetë të presidentit rus Vladimir Putin. Ai do që lufta të vazhdojë, sepse nuk është i interesuar për paqe”, tha Zelensky. Dymbëdhjetë persona, përfshirë dy fëmijë, u plagosën nga sulmi me dronë gjatë natës ndaj një ndërtese banimi në qytezën e vogël Hluhiv, e cila ndodhet në kufi me Rusinë, tha administrata ushtarake e rajonit të Sumit. Një video e shpërndarë nga Zelensky shfaq ekipet emergjente duke kërkuar për të mbijetuar në gërmadhat e ndërtesës së shkatërruar pjesërisht. Administrata ushtarake tha se forcat ruse përdorën dy dronë në këtë sulm. Forca Ajrore e Ukrainës theksoi se rrëzoi 51 dronë dhe se humbi gjurmët e 30 dronëve, pasi Rusia e sulmoi me gjithsej 87 dronë gjatë natës. Forcat ruse e kanë sulmuar pareshtur rajonin verilindor të Sumit në muajt e fundit, duke dëmtuar infrastrukturën e tij të rëndësishme civile. Një sulm me raketa në Sumi të dielën vrau 11 njerëz dhe plagosi 89 të tjerë, si dhe e la qytetin e Sumit pa energji elektrike.