Autoritetet italiane po hetojnë pistën e një sabotazhi rus në fabrikën e prodhimit të armëve, që shpërtheu pesë ditë më parë në periferi të Romës. Pista po hetohet pas të dhënave të pakonfirmuara ende zyrtarisht që prokuroria ka marrë në lidhje me një sulm të ngjashëm që ndodhi në një fabrikë prodhimi predhash në Bullgari dhe tentativave që kanë raportuar vende të tjera të Bashkimit Europian, si Polonia dhe Letonia. Ajo që përbashkon fabrikën italiane të prodhimit të armëve me rastin në Bullgari është se që të dyja ato prodhonin predha për ushtrinë ukrainase. Prokuroria italiane nuk ka dalë ende me një deklaratë zyrtare, teksa ministri italian i mbrojtjes, Guido Crosseto e ka mohuar kategorikisht mundësinë e sabotazhit rus. “Nuk ka asnjë të dhënë, asnjë indicie që të sugjerojë se shkaku i shpërthimit të 13 gushtit të jetë diçka tjetër nga ajo e një problem të brendshëm. Nuk është nevoja që të shpikim fajtorë për llogari të atyre që çdo ditë drejtojnë një luftë të rrezikshme hibride”, deklaroi ministri. Megjithatë, deklarata e tij nuk ka bindur opozitën italiane, që ka kërkuar një seancë dëgjimore në parlament.