Rusia po e shqyrton ndalimin e WhatsApp, duke e akuzuar këtë të fundit se ka dështuar ta parandalojë krimin. Ky kërcenim vjen pasi Moska po bën përpjekje t’i shtyjë rusët të kalojnë në shërbime digjitale të mbështetura nga shteti. Rusia ua kishte bllokuar përdoruesve mundësinë për të bërë thirrje në WhatsApp në gusht, si pjesë e një goditjeje më të gjerë ndaj rrjeteve sociale në pronësi perëndimore, raporton Radio Evropa e Lirë. Në një komunikatë, mbikëqyrësi rus i komunikimeve, Roskomnadzor, tha se WhatsApp po përdorej për “të organizuar dhe kryer akte terroriste në vend, për të rekrutuar autorë, si dhe për mashtrime dhe krime të tjera kundër qytetarëve tanë”. “Nëse ai nuk i përmbahet legjislacionit rus, do të bllokohet plotësisht”, thuhet në deklaratë. Gjiganti amerikan i teknologjisë Meta, i cili zotëron ËhatsApp-in, nuk ka komentuar ende për këtë paralajmërim. WhatsApp është një nga dy shërbimet më të njohura për dërgimin e mesazheve në Rusi, krahas Telegramit. Ndërkohë Moska kërkon që të ketë akses në këto dy platforma, edhe pse ekspertët e quajnë si një ndërhyrje në komunikime.