Rusia mund të ndërmarrë hapa shtesë në fushën e parandalimit bërthamor nëse SHBA vendos raketa me rreze të shkurtër dhe të mesme veprimi në Evropë dhe Azi, tha ministri i Jashtëm rus Sergei Lavrov për agjencinë shtetërore të lajmeve RIA. Agjencia iu referua planeve të SHBA-së, të shpallura në prill, për të vendosur raketa në rajonin Indo-Paqësor në përgjigje të asaj që Uashingtoni e sheh si militarizimin kinez në rritje. Dislokime të tilla do të ishin të paligjshme më parë sipas Traktatit historik të Forcave Bërthamore me rreze të mesme veprimi të vitit 1987 të nënshkruar bashkë me Rusinë, nga i cili Shtetet e Bashkuara u tërhoqën zyrtarisht në 2019 pasi thanë se Moska po shkelte marrëveshjen, një akuzë që Kremlini e mohoi. Moska ka paralajmëruar prej kohësh se do të anulonte një moratorium për vendosjen e raketave me rreze të shkurtër dhe të mesme veprimi, kur po skadonte traktati, nëse SHBA do të vazhdonte me planet për të vendosur raketa të tilla në Azi dhe Evropë. Lavrov tha për agjencinë RIA, se Rusisë mund t'i duhet të ndërmarrë edhe hapa të tjerë. “Ne nuk përjashtojmë mundësinë e ndërmarrjes së hapave shtesë në fushën e parandalimit bërthamor, sepse qendrat tona komanduese dhe vendndodhjet e forcave tona bërthamore do të jenë në rrezen e raketave amerikane të vendosura më përpara”, tha Lavrov.