Numri i të vrarëve në një sulm të Rusisë mbi një klinikë në qytetin e Zaporizhjas në Ukrainë ka shkuar në shtatë, njoftoi Shërbimi Shtetëror i Emergjencave të Ukrainës të mërkurën. Sipas këtij shërbimi, së paku 22 persona janë plagosur po ashtu, ndërsa operacionet e shpëtimit janë duke vazhduar. Guvernatori rajonal i Zaporizhias, Ivan Fedorov, shkroi në Telegram se dy gra u nxorën nga rrënojat gjatë natës dhe aktualisht ndodhen në spital. Ai shtoi se katër persona besohet se janë ende të bllokuar poshtë ndërtesës së shkatërruar nga sulmi. Rusia ka intensifikuar sulmet e saj me dronë dhe raketa në qytetet e Ukrainës, e sidomos mbi infrastrukturën e saj energjetike, tani në fillim të dimrit. Zaporizhia ishte rregullisht shënjestër e sulmeve. Më 6 dhjetor, dhjetë njerëz u vranë nga një sulm në këtë qytet. Presidenti i Ukrainës, Volodymyr Zelensky, u bëri thirrje aleatëve të Kievit një ditë më parë që t’i sigurojnë vendit edhe 10 deri në 12 sisteme të tjera të mbrojtjes ajrore, Patriot, që ai tha se janë të nevojshme për të mbrojtur plotësisht qiejt e Ukrainës.