Humbjet në fushëbeteja dhe sanksionet perëndimore e kanë cuar ushtrinë ruse në një gjendje degradimi, por Moska vazhdon të ketë mjaftueshëm fuqi zjarri për të vijuar luftën në Ukrainë. Në këtë përfundim del një analizë e re e ekspertëve të pavarur të qendrës së studimeve strategjike dhe ndërkombëtare. Raporti i tyre sjell një vlerësim të humbjeve ushtarake të Rusisë, prej thuajse 10 mijë njësish pajisje kyce si tanke, kamionë, mjete artilerie dhe dronë. Por raporti thotë edhe se Rusia mund të fusë duart në stoqet e vjetra të luftës së ftohtë për t’i përdorur në vijën e frontit, për të kompensuar atë që ka humbur në teknologji. “Cilësia e ushtrisë ruse në kuptimin e pajisjeve të avancuara, do të vijë në rënie”, thuhet në raportin e institutit. Rusët, kanë humbur tanke të shumta beteje, vecanërisht ata modernë.