Trupat ruse kanë vendosur në shënjestër objektet e infrastrukturës në rajonet jugore të Ukrainës, Dnipropetrovsk dhe Herson, duke shkaktuar dëme të konsiderueshme, thanë zyrtarët rajonalë të enjten. Kjo ndodh në kohën kur Ukraina po përgatitet për një rritje të sulmeve ndaj objekteve të saj energjetike gjatë dimrit të ardhshëm. Qytetet Krivi Rih dhe Nikopol, si dhe rrethinat e tyre, u goditën gjatë natës, tha guvernatori rajonal Serhiy Lysak, duke shtuar se nuk kishte viktima. Në Herson, një civil u plagos nga bombardimet ruse, njoftoi shefi i administratës ushtarake të qytetit, Roman Mrochko. Rusia ka bombarduar vazhdimisht Hersonin nga përtej lumit Dnjepër, pasi u tërhoq në bregun e majtë një vit më parë, ndërsa forcat ukrainase çliruan qytetin. Një ditë më parë, një 42-vjeçar u vra nga bombardimet ruse në qendër të qytetit. Në rajonet lindore të Harkivit dhe Donjeckut, forcat ukrainase zhvilluan 74 beteja të afërta gjatë 24 orëve të fundit, tha Shtabi i Përgjithshëm i ushtrisë ukrainase. Në Harkiv, trupat ukrainase zmbrapsën 12 sulme ruse në Sinkivka, Petropavlivka dhe Ivanivka, dhe rreth këtyre zonave. Në Donjeck, forcat ukrainase vazhduan ofensivën e tyre në Bahmut, qytet që ra në duart e trupave ruse në fillim të këtij viti pas një beteje të përgjakshme mujore. Ushtria tha se forcat ruse lëshuan pa sukses 42 dronë kamikazë kundër pozicioneve ukrainase. Në pikën tjetër të Donjeckut, në Avdijivka, forcat ruse vazhduan të ushtrojnë presion në përpjekjet e tyre të pasuksesshme për të rrethuar qytetin industrial që po mbrohet nga forcat ukrainase.