Skadimi i marrëveshjes së grurit ukrainas mund të jetë një lajm i mirë për fermerin shqiptar, i cili po e shet grurin vendas me një çmim mjaft të ulët. Pavarësisht subvencionit të farës nga ministria e bujqësisë, fermerët shqiptarë shprehen se po e tregtojnë grurin për vetëm 25 lekë për kilogram. Shkak bëhet gruri i importuar nga Ukraina, i cili hyn në treg me një çmim të lirë, dhe influencon për shkak të konkurrencës edhe çmimin e grurit vendas. Të dhënat e drejtorisë së Përgjithshme të Doganave, tregojnë se deri në muajin qershor në Shqipëri kanë hyrë 54 mijë ton grurë, pra krahasuar me të dhënat totale të vitit 2022 gati gjysma e importit të grurit vjen nga Ukraina. Anëtarë të Shoqatës Përpunuese të Miellit pohuan se furnizohen me grurë nga Rusia dhe Ukraina, me çmim 310 deri në 320 dollarë për ton. Krahasuar me vjeshtën e vitit të kaluar, çmimi i shitjes së grurit nga importi është ulur rreth 29 për qind.