Në orët e para të mëngjesit të së premtes, forcat ruse goditën infrastrukturën e rëndësishme në Kharkiv, qytetin e dytë më të madh të Ukrainës, dhe nisën sulme të shumta në infrastrukturën energjetike në Zaporizhja, teksa Moska i shtoi sulmet e saj në jug dhe lindje të Ukrainës. Sirenat dhe alarmet e sulmeve ajrore shpërthyen në pjesën më të madhe të vendit. Sekretari i Këshillit Bashkiak të Zaporizhjas, Anatolii Kurtiev, tha se qyteti ishte goditur 17 herë brenda një ore. Sipas tij, ky ishte intensiteti më i lartë i sulmeve që nga fillimi i pushtimit. Në Kharkiv, autoritetet po përpiqeshin të siguronin informacion mbi viktimat dhe shkallën e shkatërrimit, me kryebashkiakun Ihor Terekhov që tha se mund të ketë ndërprerje në ngrohje, furnizim me energji elektrike dhe ujë. Analistët ushtarakë thonë se presidenti rus Vladimir Putin shpreson se mbështetja e Evropës për Ukrainën do të pakësohet, pasi Rusia besohet se po përgatit një ofensivë të re. Luftimet në Ukrainë në fakt u intensifikuan të enjten. Agjencia e inteligjencës ushtarake e Kievit tha se forcat ruse kanë nisur një ofensivë në rajonet pjesërisht të pushtuara të Donjetskut dhe Luhanskut, me synim kontrollin e plotë të të gjithë rajonit industrial të Donbasit. Një ditë më parë ndërkohë, presidenti ukrainas, Volodimir Zelenski ishte në bruksel, ku kërkoi armë më të avancuara nga aleatët evropianë, duke i thënë Parlamentit Evropian se vendi i tij po lufton “kundër forcës më të madhe anti-evropiane të botës moderne”.