Ushtria siriane tha të shtunën se dhjetëra ushtarë të saj ishin vrarë në një sulm të madh të kryer nga rebelët islamikë Hayat Tahrir al-Sham të cilët hynë në qytetin e Alepos, duke e detyruar ushtrinë të ridislokohej, në sfidën më të madhe ndaj Presidentit Bashar al-Assad në disa vite. Ministria ruse e Mbrojtjes tha ndërkohë se forcat e saj ajrore kishin kryer sulme ndaj rebelëve sirianë në mbështetje të ushtrisë së vendit, njoftuan agjencitë ruse të lajmeve. Sulmet pasuan atë që ishte sulmi më i guximshëm i rebelëve në vite të tëra, në një luftë civile ku linjat e frontit ishin ngrirë kryesisht që nga viti 2020. Hayat Tahrir al-Sham, dikur i njohur si Fronti Nusra, është shpallur grup terrorist nga SHBA, Rusia, Turqia dhe shtete të tjera. Presidenti sirian, bashar al Assad është ndërkohë një aleat i ngushtë i Moskës. Në Uashington, Këshilli i Sigurisë Kombëtare i Shtëpisë së Bardhë tha se po monitoronte nga afër situatën dhe se kishte qenë në kontakt me kryeqytetet rajonale gjatë 48 orëve të fundit. Zëdhënësi i këshillit, Shon Savet, tha se refuzimi i Sirisë për t'u përfshirë në një proces politik dhe mbështetja e saj tek Rusia dhe Irani kishte "krijuar kushtet që po shpalosen tani, duke përfshirë rënien e linjave të regjimit të Asadit në Sirinë veriperëndimore". Sipas Savett, SHBA nuk kishte asnjë lidhje me ofensivën e udhëhequr nga "një organizatë e caktuar terroriste" dhe "kërkonte de-përshkallëzimin si edhe një proces politik serioz dhe të besueshëm" sipas Rezolutës 2254 të Këshillit të Sigurimit të OKB-së të vitit 2015, e cila përcaktoi hapat për një armëpushim dhe tranzicion politik.