Rusia ka bërë të ditur se do të dërgojë muzikantë në frontin e luftës në Ukrainë, për të rritur moralin e ushtarëve të saj. Ministria ruse e Mbrojtjes tha se është duke punuar për formimin e “brigadës kreative në vijë të frontit”, e cila do të përfshijë vokalistë dhe muzikantë. Qeveria ruse ka thënë se ministri rus i Mbrojtjes, Sergei Shoigu, ka vizituar ushtrinë në Ukrainë. Në një deklaratë të publikuar në Telegram, autoritetet thanë se Shoigu “ka shkuar në zonat ku janë të angazhuar trupat dhe ka kontrolluar avancimin e njësive në kuadër të operacionit special ushtarak”. Këto raportime vijnë pasi zyrtarë britanikë të Mbrojtjes kanë thënë se morali i ulët vazhdon të jetë “pikë e ndjeshme në mesin e ushtrisë ruse”. Në krijim e sipër të brigadës kreative, Rusia ka nisur një fushatë, duke iu bërë thirrje banorëve që të japin instrumentet muzikore si donacione. Sipas medias ruse, RBC, brigada do të përbëhet nga trupat e rekrutuar si dhe nga “artistët profesionistë që i janë bashkuar ushtrisë në mënyrë vullnetare”. Njësia e re do të ketë për detyrë të mbajë "një gjendje të lartë morale, politike dhe psikologjike trupat në frontin e parë. Ekspertët ndërkohë vënë në pikëpyetje faktin nëse brigada e re do të mundet ta arrijë qëllimin në një kohë kur trupat ruse janë përballur me një numër të lartë viktimash, udhëheqje të dobët, probleme me pagat, mungesë pajisjesh e municionesh si edhe mungesë qartësie për objektivat e luftës.