Rusia lëshoi një raketë Soyuz mëngjesin e së martës, që mbante dy satelitë të projektuar për të monitoruar motin hapësinor rreth Tokës dhe 53 satelitë të vegjël, përfshirë edhe dy iranianë, tha agjencia ruse e hapësirës Roscosmos. Anija hapësinore Soyuz, e cila u ngrit nga kozmodromi rus Vostochny, mbante dy satelitë Ionosfera-M, të cilët do të bëhen pjesë e sistemit hapësinor për monitorimin e jonosferës së Tokës, tha agjencia. Jonosfera, ku atmosfera e Tokës takohet me hapësirën, shtrihet afërsisht 80 deri në 644 km mbi sipërfaqen e Tokës, sipas informacionit të dhënë në faqen e internetit të NASA-s. Çdo satelit Ionosfera-M peshon 430 kg dhe orbita e tij e punës është në një lartësi prej 820 km, sipas agjencisë së lajmeve Interfax. Sistemi do të përfshijë gjithsej katër nga satelitët Ionosfera-M. Dy pajisjet e ardhshme janë planifikuar të lansohen në vitin 2025, raportoi Roscosmos. Midis 53 satelitëve të vegjël janë edhe dy satelitë iranianë, Koësar, një satelit i imazhit me rezolucion të lartë dhe Hodhod, një satelit i vogël komunikimi, si dhe sateliti i parë studentor ruso-kinez Druzhba ATURK.