Rusia kërkon ngritjen e një sistemi financiar global që do të konkurrojë me sistemin aktual të dominuar nga SHBA dhe dollari amerikan. Propozimi i Moskës është bërë përmes ministrit të financave të Rusisë, që tha se do të propozojë ngritjen e një fondi financiar për vendet e BRICS, të ngjashëm me modelin e Fondit Monetar Ndërkombëtar. BRICS, fillimisht i përbërë nga Brazili, Rusia, India dhe Kina, është zgjeruar duke përfshirë Afrikën e Jugut, Egjiptin, Etiopinë, Iranin, Emiratet e Bashkuara Arabe dhe Arabinë Saudite. Zyrtarët kryesorë të financave dhe të bankës qendrore të BRICS u takuan në Moskë të premten. Ministri rus i financave Anton Siluanov tha se sistemi financiar global kontrollohet nga vendet perëndimore dhe se grupi, i cili përfaqëson 37 për qind të ekonomisë globale, duhet të krijojë një alternativë. "FMN dhe Banka Botërore nuk po kryejnë rolet e tyre. Ata nuk po punojnë në interes të vendeve të BRICS", tha Siluanov në një veprimtari në ditën e parë të takimit. “Duhet të krijohen kushte të reja apo edhe institucione të reja, të ngjashme, por në kuadër të komunitetit tonë, në kuadër të BRICS”, shtoi Siluanov. Rusia ka të ngrira kapitalet e saj në euro dhe dollarë, ndërsa është izoluar nga tregjet ndërkombëtare pas sanksioneve të perëndimit. Moska ka hasur vështirësi në shmangien e këtyre sanksioneve dhe vonesa në transaksione me vendet e BRICS, pasi bankat e këtyre vendeve u tremben ndëshkimeve perëndimore për shkeljen e sanksioneve.