Gjermania dhe Britania e Madhe kanë paralajmëruar për kërcënimin në rritje që paraqesin satelitët hapësinorë rusë dhe kinezë, të cilët janë parë rregullisht duke spiunuar satelitët e përdorur nga fuqitë perëndimore. Të dy vendet kanë denoncuar javët e fundit raste kur Rusia ka ndjekur, bllokuar dhe ndërhyrë në satelitët e tyre në hapësirë. "Veprimet e Rusisë, veçanërisht në hapësirë, përbëjnë një kërcënim themelor për të gjithë ne. Një kërcënim që nuk mund ta injorojmë më", tha Ministri gjerman i Mbrojtjes Boris Pistorius në një konferencë në Berlin të liderëve të industrisë hapësinore në shtator. Shënjestrimi i satelitëve të komunikimit mund të ndikojë në imazhet satelitore, telekomunikacion dhe aksesin në internet satelitor. Ndërprerja e sistemeve të navigimit dhe pozicionimit mund të dëmtojë operacionet ushtarake, si dhe në viacionin civil. Paralajmërimet vijnë pas pushtimit në shkallë të plotë të Ukrainës nga Rusia, i cili po i afrohet tani vitit të katërt. Zyrtarët ukrainas thonë se Moska ka rritur nivelin e bashkëpunimit me Kinën, me Pekinin që kryen zbulim satelitor të territorit ukrainas në emër të saj.