Një komentator me ndikim i televizionit shtetëror rus ka sugjeruar që Rusia duhet të shënjestrojë satelitët e Elon Musk në hapësirë me armë bërthamore. "Nuk e kuptoj pse, për shembull, satelitët e Elon Musk nuk janë një objektiv legjitim për ne", tha Vladimir Solovyov, një prezantues i njohur i televizionit shtetëror i lidhur ngushtë me Kremlinin. "Një shpërthim i një arme bërthamore në hapësirë, siç e kuptoj unë, e zgjidh këtë problem." Starlink, i kompanisë SpaceX të Musk, ka qenë për vite me radhë, jetik për Ukrainën në fushën e betejës, me Kievin që mbështetet shumë në aksesin e tij në internet për komunikime dhe për kontrollin e flotës së dronëve. Rrjeti Starlink me mijëra satelitë ndodhet në orbitën e afërt të Tokës. Ukraina ka thënë për vite me radhë se forcat ruse kanë përdorur terminalet Starlink përgjatë vijës së frontit, duke përfshirë zonat më të kontestuara të Ukrainës lindore. Musk ka mohuar se Starlink po i shitet Rusisë dhe tha të dielën se kompania e tij në mënyrë efektive ka ndaluar përdorimin "e paautorizuar" të Starlink nga Moska pas protestave të fundit të Ukrainës. Agjencitë e inteligjencës nga dy vende të NATO-s, sipas Associated Press, besojnë se Rusia po zhvillon një armë anti-satelitore për të synuar Starlink. Arma do të mbushte orbitat e Starlink me cifla që do të dëmtonin gjithashtu gjithcka që gjendet pranë.