Rusia shihet si kërcënimi më I madh dhe më I drejtpërdrejtë për sigurinë, paqen dhe stabilitetin në rajonin euroatlantik sipas raportit vjetor të NATO-s që vlerëson se Kremlini “ka vazhduar të testojë aleancën ushtarake perëndimore, duke u bërë gjithnjë e më i pakujdesshëm, përmes shkeljeve të hapësirës ajrore, sabotimit dhe aktivitetit malinj kibernetik”. Raporti u prezantua nga Sekretari i Përgjithshëm i aleancës, Mark Rutte I cili tha se Rusia ka të ngjarë të përqendrohet në shënjestrimin e infrastrukturës energjetike nëse do të sulmojë NATO-n. “Rusia mbetet kërcënimi më i madh dhe më i frikshëm për sigurinë në rajonin euroatlantik. Gjatë vitit të kaluar, Rusia është përpjekur të testojë sigurinë tonë dhe të sfidojë shoqëritë tona, qoftë përmes shkeljeve të hapësirës ajrore, sabotimeve dhe aktiviteteve dashakeqe kibernetike, apo përmes ndërhyrjes politike dhe kërcënimeve informative. Përgjigjja e NATO-s ndaj provokimeve të pamenduara, qoftë nga Rusia apo të tjerët, ka qenë e qartë, e shpejtë dhe vendimtare”, tha Rutte në një konferencë për shtyp. Raporti vjetor shqyrton përfundimet kryesore dhe arritjet e NATO-s në vitin 2025 dhe thekson se “lufta e agresionit e Rusisë kundër Ukrainës ka treguar se energjia ka të ngjarë të jetë objektivi kryesor në çdo sulm të drejtuar ndaj NATO-s”.