Rusia nuk ka forca të mjaftueshme në terren për të bërë një përparim të madh në Ukrainë pas nisjes së një ofensive në rajonin e Kharkhivit, tha të enjten një komandant i lartë i NATO-s. "Rusët nuk kanë numrat e nevojshëm për të bërë një përparim strategjik... aq më tepër ata nuk kanë aftësinë dhe kapacitetin për ta bërë këtë," u tha gazetarëve gjenerali amerikan Christopher Cavoli, Komandanti Suprem i Aleatëve të NATO-s në Evropë. "Kam qenë në kontakt shumë të ngushtë me kolegët tanë ukrainas dhe kam besim se ata do të mbajnë linjën," tha Cavoli pasi ushtria ukrainase informoi drejtuesit e lartë të NATO-s. Ukraina tha të enjten se po përpiqej të "stabilizonte" vijën e frontit në rajonin verilindor të Kharkivit, ku Moska ka bërë avancimet e saj më të mëdha territoriale në 18 muaj, pasi filloi një ofensivë të shpejtë javën e kaluar. Presidenti Volodymyr Zelensky tha se Kievi po dërgonte akoma më shumë përforcime në zonë dhe ushtria ukrainase tha se kishte arritur të ndalonte pjesërisht përparimin e Rusisë. Moska ka kapur 278 kilometra katrorë të territorit ukrainas midis 9 dhe 15 majit, sipas përllogaritjeve të AFP bazuar në të dhënat nga Instituti për Studimin e Luftës, avancimi më i madh territorial në një operacion të vetëm që nga Dhjetori 2022. Cavoli tha se aleatët e Ukrainës po shpejtonin dërgesat e armëve për forcat e Kievit pasi Uashingtoni miratoi një paketë të madhe ndihme pas muajsh vonesë. "Atyre po dërgohen sasi të mëdha municionesh, sasi të mëdha sistemesh të mbrojtjes ajrore me rreze të shkurtër veprimi dhe sasi të konsiderueshme automjetesh të blinduara tani," tha ai.