Ukraina dhe Rusia kanë fajësuar njëra-tjetrën pas një zjarri që shpërtheu në termocentralin gjigant bërthamor të Zaporizhzhias të dielën. Presidenti i Ukrainës Volodymyr Zelensky tha se forcat ruse kishin shkaktuar një zjarr në centralin që është pushtuar nga forcat e Moskës prej më shumë se dy vjetësh. Guvernatori i instaluar nga rusia në Zaporizhzhia, tha se zjarri u shkaktua nga bombardimet ukrainase. Mbikëqyrësi bërthamor i OKB-së tha se pa "tym të dendur dhe të zi" që dilte nga objekti, por konfirmoi se nuk kishte "asnjë ndikim të raportuar" për sigurinë bërthamore. Të dielën, Yevgeny Balitsky, guvernatori i instaluar nga Kremlini në Zaporizhzhia, tha se një zjarr kishte shpërthyer në kullat ftohëse të termocentralit. Ai fajësoi bombardimet ukrainase, por kërkoi "qetësi", duke shtuar se nuk kishte pasur rritje të rrezatimit rreth uzinës. Zelensky tha gjithashtu se nuk kishte asnjë rritje të rrezatimit ose rrezik të një rrjedhjeje bërthamore, por akuzoi Rusinë për shkaktimin e qëllimshëm të zjarrit në një përpjekje për të "shantazhuar" Kievin. Në orët e para të së hënës, Vladimir Rogov, një zyrtar tjetër i instaluar në Kremlin, tha se zjarri ishte "shuar plotësisht" në një postim në Telegram. Termocentrali bërthamor ka qenë nën kontrollin e trupave dhe zyrtarëve rusë që nga viti 2022. Ai nuk ka prodhuar energji prej më shumë se dy vjetësh dhe të gjashtë reaktorët janë mbyllur që nga prilli. Zhvillimi vjen pasi trupat ukrainase kanë avancuar deri në 30 km brenda Rusisë, në inkursionin më të thellë dhe më domethënës që kur Moska filloi pushtimin e saj në shkallë të plotë në shkurt 2022.