Rusia po përdor median online Red për të mbjellë pakënaqësi në shoqërinë gjermane, si pjesë e një fushate dezinformimi të zhvilluar paralelisht me luftën e saj në Ukrainë, tha të mërkurën ministria e jashtme në Berlin. "Red paraqitet si një platformë revolucionare për gazetarët e pavarur. Megjithatë, ajo ka lidhje të ngushta me median shtetërore ruse RT", u tha një zëdhënës i ministrisë së jashtme gazetarëve në Berlin. "Sot mund të konfirmojmë se Red po përdoret nga Rusia posaçërisht për të manipuluar informacionin", shtoi zëdhënësi. Red drejtohet nga kompania turke mediatike AFA Medya, e cila së bashku me themeluesin e saj Huseyin Dogru është tashmë subjekt i sanksioneve të BE-së që synojnë Rusinë dhe akuzohet për "minimin e procesit politik demokratik" në Gjermani. Pasi u sanksionua, Red njoftoi më 16 maj se po mbyllej. Më herët mediat gjermane shkruanin se gënjeshtra të inskenuara qëllimisht për kancelarin Friedrich Merz qarkullonin në mediat sociale. Qeveria gjermane, sipas të dhënave, ka regjistruar një fluks të madh postimesh, vecanërisht që nga betimi i Merz si kancelar. Ekspertët kishin paralajmëruar se përhapja e shumë lajmeve të rreme mbi kancelarin gjerman, mund të ishte e lidhur me Kremlinin. Mbrojtja e fortë e Merzit për ukrainën, dhe deklaratat e ashpra për më shumë mbështetje financiare, mund të shihen në Kremlin si një kërcënim i drejtpërdrejtë.