Forcat ruse do të shtyhen deri në zemër të Ukrainës nëse arrijnë të kapin qytetin që ndodhet në vijën e parë të frontit, Chasiv Yar, dhe rajonin më të gjerë të Donbasit, ka paralajmëruar një guvernator ukrainas. Vadym Filashkin, guvernatori i rajonit të Donetskut, tha për Sky Neës se ushtarët e vendit të tij nuk do të lejonin që kjo të ndodhte dhe do të bënin "çdo gjë të mundur dhe të pamundur" për të zbrapsur pushtuesit rusë. Por ai tha se trupat e Vladimir Putinit po përpiqeshin të canin linjat mbrojtëse të Ukrainës lindore, me 1,500 deri në 2,500 predha artilerie dhe sulme ajrore në rajon çdo ditë. I pyetur se cili ishte rreziku për Ukrainën dhe botën nëse i gjithë Donbasi bie nën kontrollin rus, Filashkin tha: "Armiku do të ecë përpara. Nëse, mos e dhëntë zoti kjo ndodh, armiku do të përparojë më tej në territorin qendror të vendit. Guvernatori tha se rreth 2,500 civilë vetëm në rajonin e tij ishin vrarë dhe pothuajse 5,000 ishin plagosur që kur Rusia filloi pushtimin në shkallë të plotë në shkurt 2022. Filashkin po fliste pranë një flamuri gjigant ukrainas që valëvitej mbi një park në qytetin e Kramatorskut, qendra kryesore administrative për zonën dhe një bastion jetik ushtarak. Kramatorsku, së bashku me qytetet e tjera lindore si Konstantinivka dhe Slovyansku, do të rrezikohen nëse forcat ruse kapin Chasiv Yar-in. Qyteti ndodhet majë një kodre dhe do të vendoste një zonë shumë të gjerë në rrezen e artilerisë ruse.