Shërbimi Federal i Sigurisë në Rusi, FSB, tha të mërkurën se ka arrestuar një shtetas gjerman, të cilin e akuzon se synonte të sabotonte objektet energjetike me urdhër të një shtetasi ukrainas. FSB-ja tha në një komunikatë, të publikuar nga agjencitë ruse të lajmeve, se arrestoi shtetasin gjerman Nikolai Gayduk ndërsa ai po hynte në Kaliningard të Rusisë nga Polonia. FSB tha se në makinën e tij kishte gjetur dhe konfiskuar gjysmë litri eksploziv të lëngshëm. Shërbimi rus i sigurisë nuk tregoi nëse Gayduk ka edhe shtetësi ruse, ose nëse ai kishte një vizë për të hyrë në Rusi. Nuk është bërë e ditur saktësisht se kur është arrestuar ai. FSB-ja e akuzoi Gayduk, banor i Hamburgut i lindur në 1967-ën, se kishte planifikuar vepra sabotimi me urdhrat e një ukrainasi, Alexander Zhorov, i cili jeton në Hamburg gjithashtu. Ajo tha se Gayduk ishte i përfshirë në një shpërthim, në një stacion të shpërndarjes së gazit në Kaliningrad, në mars të vitit 2024, dhe se ndaj tij është ngritur aktakuzë për sulm terrorist dhe kontrabandë të lëndëve shpërthyese. Një gjykatë urdhëroi që Gayduk të mbahet në paraburgim në pritje të gjyqit, deri në përfundimin e hetimit, raportoi agjencia ruse e lajmeve Interfax. Ajo nuk dha hollësi të tjera. Autoritetet gjermane ndërkohë nuk e kanë komentuar ende lajmin.