Ndërsa luftime të ashpra vazhdojnë në Ukrainë, zëdhënësi i Kremlinit, Dmitry Peskov, tha se një takim mes presidentëve të Rusisë dhe Shteteve të Bashkuara “nuk është i nevojshëm tani për tani”. Komentet e tij, të publikuara nga agjencia TASS më 2 nëntor, janë shenjë shtesë se Moska është e vendosur ta vazhdojë pushtimin e plotë, pothuajse katërvjeçar, të Ukrainës, pavarësisht përpjekjeve për paqe të udhëhequra nga SHBA-ja. “Çfarë nevojitet tani është një punë shumë e kujdesshme për të shtjelluar hollësi specifike të problemit” tha Peskov, pa dhënë hollësi të mëtejshme. Tensionet mes Moskës dhe Uashingtonit janë rritur sërish, pavarësisht përpjekjeve të vazhdueshme diplomatike për t'i dhënë fund luftës në Ukrainë. Një ditë më parë, Uashingtoni vendosi të furnizojë Ukrainën me raketa tomahaëk duke zemëruar Moskën. Zëdhënësja e Ministrisë së Jashtme ruse Maria Zakharova kritikoi vendimin e fundit të Uashingtonit duke thënë se "dërgimi i më shumë armëve në Ukrainë nuk do të ndihmojë në zgjidhjen e konfliktit". Deklarata vjen pas shtyrjes së pacaktuar të një samiti të planifikuar mes Trump dhe putinit në Budapest, i njoftuar fillimisht nga presidenti amerikan pas një bisede telefonike me Putinin më 16 tetor. Trump më vonë tha se besonte se bisedimet "nuk do të arrinin rezultatin e dëshiruar" dhe më pas vendosi sanksione të reja ndaj dy kompanive më të mëdha të naftës dhe gazit në Rusi. Zyrtarët rusë sqaruan se samiti i Budapestit ishte shtyrë, jo anuluar, duke theksuar se iniciativa për bisedime kishte ardhur nga Uashingtoni. Megjithatë, ky veprim nënvizon tensionin në rritje në marrëdhëniet SHBA-Rusi, pasi Trump thuhet se është i frustruar me atë që ai e sheh si ngurrim të Moskës për t'u angazhuar në mënyrë konstruktive në negociatat e paqes për t'i dhënë fund luftës që filloi në vitin 2022.