Një dron rus ka goditur një anije mallrash me pronësi turke në një kanal të Deltës së Danubit në Ukrainë, pranë kufirit me Rumaninë. Anija M/V Mariam M, e cila ishte nisur nga Latakia e Sirisë dhe po udhëtonte drejt Galaçit, është goditur gjatë lundrimit. Sipas burimeve ukrainase, nga sulmi ka humbur jetën kapiteni dhe janë plagosur tre anëtarë të ekuipazhit. Burimet turke raportojnë një bilanc më të rëndë, duke thënë se kanë vdekur kapiteni dhe piloti i portit, ndërsa 13 persona janë plagosur. Nga goditja, ura e komandimit është përfshirë nga flakët dhe është dëmtuar rëndë, ndërsa zjarri ka përfshirë edhe pjesën e akomodimit të anijes. Sulmi ndodhi në një zonë strategjike të Deltës së Danubit, pranë kufirit me Rumaninë, ku gjatë luftës janë regjistruar edhe incidente të tjera që kanë rrezikuar trafikun detar.