Shtetet e Bashkuara kanë deklaruar se kanë informacione se afër 8.000 ushtarë të Koresë së Veriut tani janë në rajonin rus të Kurskut, afër kufirit me Ukrainën, dhe Rusia “synon” që t’i dislokojë ata në fushëbetejë kundër forcave ukrainase. Sekretari amerikan i Shtetit, Antony Blinken, tha se SHBA-ja pret që trupat të dërgohen në vijën e frontit në ditët në vijim. “Një nga arsyet që Rusia po përdor trupat e Koresë së Veriut është sepse është e dëshpëruar. Putin gjithnjë e më shumë po dërgon gjithnjë e më shumë rusë në luftën vrastare në Ukrainë”, tha Blinken. Rusia ka trajtuar trupat e Koresë së Veriut për përdorimin e artilerisë, dronëve dhe për operacione bazike të këmbësorisë, tha më tej Sekretari amerikan i Shtetit. Ai shtoi se Rusia po pëson afër 1.200 viktima në ditë në lindje të Ukrainës, më shumë që kur ka nisur lufta më 2022. Dislokimi i trupave të Koresë së Veriut në Rusi ka rritur shqetësimet për destabilizimin e mëtejmë të rajonit të Azi-Paqësorit dhe të luftës së Moskës kundër Ukrainës. SHBA-ja ka vlerësuar se afër 10.000 trupa të Koresë së Veriut janë në rusi. Seuli dhe aleatët e tij kanë vlerësuar se numri është rritur në 11.000, ndërsa Ukraina ka thënë se ky numër është më i lartë, 12.000. Sakaq, Moska dhe Pheniani nuk e kanë pranuar drejtpërdrejt dislokimin e trupave.