Presidenti ukrainas Volodymyr Zelensky tha se Rusia po përgatitej të niste një "vit të ri lufte" kundër vendit të tij pasi homologu i tij Vladimir Putin tha se Moska "me siguri" do t'i arrinte objektivat e saj. "Sot, dëgjuam një tjetër sinjal nga Moska se ata po përgatiten ta bëjnë vitin e ardhshëm, një vit lufte", tha Zelensky në fjalimin e tij të përnatshëm. Deklarata ishte një reagim ndaj Putinit, i cili më herët tha se Rusia do të arrinte qëllimet e saj në ofensivën e saj në Ukrainë, duke përfshirë kapjen e territoreve ukrainase që i pretendon si të vetat, mes një fluksi diplomacie ndërkombëtare për t'i dhënë fund luftës. Komentet e Putinit vijnë ndërsa Ukraina të hënën përshëndeti "progresin" e bërë në çështjen e garancive të sigurisë në të ardhmen për Kievin, pas dy ditësh bisedime me të dërguarit e Presidentit amerikan Donald Trump në Berlin. Por sipas Zelenskit, mbeten dallime në çështjen se cilat territore Ukraina do të duhej t'i lëshonte Rusisë. Propozimi fillestar i Uashingtonit,- i kritikuar nga Ukraina dhe aleatët e saj si tepër i favorshëm për Rusinë, do të shihte Kievin të tërhiqej nga rajoni i saj lindor i Donetskut dhe Shtetet e Bashkuara të njihnin de facto rajonet e Donetskut, Krimesë dhe Luhanskut si ruse. Përmbajtja aktuale e planit të rishikuar mbetet e paqartë. Më herët të mërkurën, Kremlini tha se Rusia po priste informacione nga SHBA-të mbi rezultatin e bisedimeve në Berlin. "Ne presim që, sapo të jenë gati, homologët tanë amerikanë të na informojnë për rezultatet e punës së tyre me ukrainasit dhe evropianët", u tha gazetarëve zëdhënësi i Kremlinit, Dmitry Peskov. Zelensky do të marrë pjesë në samitin e liderëve evropianë në bruksel ku pritet të miratohet një plan për të përdorur asetet e ngrira ruse për të mbështetur mbrojtjen e Ukrainës. Por ai paralajmëroi në fjalimin mbrëmjes se sinjalet luftarake të Putinit "nuk janë vetëm për ne". "Është e rëndësishme që partnerët tanë ta shohin këtë, dhe e rëndësishme që ata jo vetëm ta shohin, por edhe të përgjigjen, përfshirë partnerët tanë në Shtetet e Bashkuara të Amerikës, të cilët shpesh thonë se Rusia supozohet se dëshiron t'i japë fund luftës", tha ai, duke akuzuar Moskën se po përpiqet të "minojë diplomacinë".