Kremlini ka mirëpritur fitoren në zgjedhjet parlamentare të shpallur nga presidenti serb, Aleksandar Vuçiç. Serbia dhe Rusia historikisht kanë raporte të ngushta dhe Beogradi nuk u është bashkuar sanksioneve ndërkombëtare të vendosura ndaj Moskës për shkak të pushtimit të paprovokuar të Ukrainës. Serbia mbajti të dielën zgjedhjet e jashtëzakonshme parlamentare, pas të cilave Vucic nxitoi të shpallë fitoren, “Ne mirëpresim këtë arritje nga zoti Vuçiç”, u tha gazetarëve zëdhënësi i Kremlinit, Dmitry Peskov. Ai shtoi se Moska shpreson që rezultati do të çojë “në forcimin e mëtejshëm të miqësisë” mes dy shteteve. Peskov po ashtu iu referua Serbisë si shtet “vëllazëror”. Një pjesë e konsiderueshme e popullsisë së Serbisë ka mbështetur fushatën ushtarake të Moskës në Ukrainë, ndërsa shpreh mospëlqim për aleancën ushtarake të NATO-s që mbështet Kievin. Por, Beogradi po ashtu është një qendër e rëndësishme për rusët që kritikojnë luftën e Moskës dhe që po largohen nga vendi. Serbia në anën tjetër e ka dënuar agresionin e Rusisë dhe ka mbështetur rezolutat e Kombeve të Bashkuara për të dënuar luftën ndaj Ukrainës.