Kremlini dërgoi dy grupe luftanijesh për manovra të përbashkëta me Kinën, në ujërat aziatike, këtë javë, në një demonstrim force që ka në shënjestër takimin e liderëve të NATO-s në Uashington. Dy korveta u nisën nga porti në lindjen e largët të rusisë, Vladivostok, për të kryer misione të caktuara në rajonin e azi-paqësorit. Anijet luftarake 2200 tonëshe do të kryejnë stërvitje anti-nëndetëse, mbrojtje ajrore dhe anti-sabotazh në det gjatë dislokimit të tyre, tha agjencia ruse e lajmeve Tass. Nuk është e qartë se kur do të përfundojë misioni i tyre, apo nëse anijet do të ndalen në ndonjë port. Të hënën, Zyra e Stafit të Përbashkët në Ministrinë e Mbrojtjes të Japonisë tha se korvetat Rezki dhe Gromki, kaluan përmes ngushticës Tsushima, një rrugë ujore strategjike që ndan Gadishullin Korean dhe arkipelagun japonez. Anijet po vijojnë në jugperëndim, nga Deti i Japonisë në Detin e Kinës Lindore, thuhet në raport. Një anije e tretë detare ruse u vu re nga Forcat Detare Japoneze të shtunën. Anija spiune e klasit Vishnya, Kareliya, lundroi në veri nga Deti i Filipineve në Detin e Kinës Lindore, përmes ngushticës Miyako, tha Shtabi i Përbashkët në një raport të veçantë. Është e paqartë, nëse Kareliya, një anije që shërben për mbledhjen e sinjaleve të inteligjencës, do të marrë pjesë apo jo në stërvitje. Të paktën pesë luftanije ruse kanë kaluar tranzit në detin e kinës lindore, këtë muaj.