Rusia dhe Kazakistani po vijojnë të përballen me përmbytje masive. Niveli i lumenjëve është rritur duke rrezikuar zgjerimin e hartës së përmbytjeve. Si Astana ashtu edhe Moska i kanë quajtur përmbytjet më të këqijat në dekada, duke shpallur gjendjen e jashtëzakonshme. Shumë qytete dhe fshatra vijojnë të jenë nën ujë Më shumë se 100,000 njerëz janë evakuuar deri më tani. Evakuimet më të mëdha kryesisht kanë qenë në Kazakistan. Ndërkohë Kremlini tha se situata mbetet "e vështirë" në pjesë të mëdha të Rusisë, por këmbënguli se Presidenti Vladimir Putin - deri më tani - nuk ka plane për të vizituar zonën. Kurse autoritetet e Kazakistanit thanë se prej nisjes së përmbytjeve janë evakuuar më shumë se 86 mijë njerëz. Po ashtu vështirësitë janë shtuar edhe për kafshët e shpendët për shkak të mungesës së bazës ushqimore. Ministri rus i Situatave të Emergjencave Alexander Kurenkov vizitoi rajonet Orenburg dhe Kurgan, duke theksuar se situata në të dy shtetet është tejet e rëndë pasi shumë fshatra ndodhen nën ujë.