Sipas inteligjencës amerikane, Vladimir Putini është duke planifikuar sulme ndaj destinacioneve të njohura turistike në të gjithë Evropën. Kjo vjen një muaj pasi kreu i CIA-s, John Ratcliffe, bëri një udhëtim sekret në Moskë, ku thuhet se paralajmëroi shefat e shërbimeve sekrete të liderit rus që të mos sulmonin shtetet e NATO-s. Sipas gazetës "El Mundo", inteligjenca amerikane ka paralajmëruar tashmë se Putini mund të nisë sulme me dronë ndaj Spanjës, Francës ose Italisë duke përdorur të ashtuquajturën "flotë hije". Kërcënime të tilla mund të shndërrohen në një makth për mijëra turistë që dynden drejt vendpushimeve të njohura përgjatë bregdetit të Mesdheut. Një burim i lidhur me sektorin e mbrojtjes në Lituani tha se moska do të përdorë dronë të lëshuar nga deti dhe të fshehur brenda kontejnerëve të mallrave. "Nuk është dhe aq e ndërlikuar." Me ndihmën e flotës hije të Rusisë, dronët "Gerbera" të Putinit mund të lëshohen nga ujërat ndërkombëtare, ndoshta në një distancë prej 200 deri në 300 km larg bregut. Ngarkesa shpërthyese e dronit "Gerbera" është e mjaftueshme për të shkaktuar zjarre, për të dëmtuar pajisje ose për të mbyllur përkohësisht një port apo aeroport. Megjithatë, raporti i inteligjencës amerikane nuk përmendi objektiva specifikë përgjatë bregdetit të Mesdheut. Ai paralajmëron se "ndikimi i mundshëm mund të jetë jo vetëm material, por edhe politik e ekonomik". Raporti vjen në një kohë kur shërbimet perëndimore të inteligjencës paralajmërojnë se Rusia mund të ndërmarrë sulme të kufizuara ndaj vendeve të NATO-s brenda pak muajve. Deri më tani, kërcënimi është përqendruar kryesisht në krahun lindor të Evropës, me dronë që kanë shkelur hapësirën ajrore të aleancës në Poloni, Rumani, Lituani dhe Letoni.