Rusia do të hakmerret kundër vendeve të NATO-s që lehtësojnë sulmet me raketa me rreze të gjatë veprimi kundër territorit rus nga Ukraina, tha shefi i inteligjencës së jashtme të vendit, Sergei Naryshkin. Ai tha se ndryshimet e shpallura nga Presidenti Vladimir Putin në doktrinën bërthamore të Rusisë nënkuptonin se ishte në fakt e pamundur të mposhtej Rusia në fushën e betejës. “Armiqtë tanë janë të detyruar të pranojnë se vendosmëria e presidentit rus për të mbrojtur me vendosmëri interesat themelore të vendit me të gjitha mjetet e disponueshme ngushton hapësirën për manovrim për Uashingtonin dhe Brukselin”, tha ai. “Përpjekjet e aleatëve individualë të NATO-s për të siguruar sulmet e mundshme me raketa perëndimore me rreze të gjatë veprimi thellë në territorin rus, nuk do të mbeten pa u ndëshkuar” – tha ai. “Elitat ushtarako-politike të Perëndimit po ndërgjegjësohen gjithnjë e më shumë për seriozitetin e synimeve të Rusisë dhe nevojën për më shumë vetëpërmbajtje në veprimet e tyre, për të shmangur përfshirjen në një konflikt të drejtpërdrejtë ushtarak me vendin tonë, i cili mund të çojë në pasoja katastrofike për ta," vijoi Naryshkin. Këshilli i Sigurisë Kombëtare në SHBA, ka thënë se nuk sheh ndonjë arsye për të rrishikuar qëndrimin bërthamor të vendit. Por Naryshkin tha se ndryshimet ruse, të cilat Putin i njoftoi fillimisht në shtator, ishin "parë me shumë kujdes" në Perëndim. "Ata e kuptojnë se rregullimet e shpallura nga V.V. Putini zhvlerësojnë në masë të madhe përpjekjet e Shteteve të Bashkuara dhe NATO-s për të shkaktuar një "disfatë strategjike" ndaj vendit tonë dhe zgjerimi i planifikuar i listës së bazave që mbajnë armë bërthamore, përjashton mundësinë e fitores ndaj Forcave të Armatosura Ruse në fushë betejë”, tha ai.