Presidenti rus Vladimir Putin tha të mërkurën se Rusia do të përgjigjet në të njëjtën mënyrë nëse vendet evropiane sekuestrojnë anije tregtare ruse. Komentet vijnë ndërsa BE po intensifikon presionin mbi të ashtuquajturën flotë hije të Rusisë, duke zgjeruar sanksionet kundër qindra anijeve dhe duke ndaluar disa anije dhe ekuipazhet e tyre për kontrolle. Disa qeveri evropiane kanë thënë se po shqyrtojnë masa më të ashpra detare kundër anijeve të dyshuara për shmangie të sanksioneve. Agjecia ruse e lajmeve TASS citoi Putinin të thoshte: "Sigurisht, kjo nuk është gjë tjetër veçse pirateri dhe banditizëm. Dhe nëse kjo vihet në praktikë, ne do të detyrohemi të përgjigjemi në të njëjtën mënyrë". Ai tha, sipas TASS, se çdo veprim hakmarrës rus nuk do të kufizohet vetëm në ato ujëra ku u sekuestruan anijet ruse, por "do të ndodhë kudo që konsiderohet e nevojshme dhe e përshtatshme". Putin foli nga ishulli i largët lindor i rusisë, Sakhalin, ku po vëzhgon disa stërvitje ushtarake. TASS gjithashtu e citoi atë duke akuzuar NATO-n për ndërhyrje në rajonin e Azi-Paqësorit dhe për krijimin e tensioneve në Arktik.