Zyrtari i lartë i sigurisë ruse, Dmitry Medvedev, tha të martën se qëllimi i mbajtjes së bisedimeve të paqes me Ukrainën ishte të sigurohej një fitore e shpejtë dhe e plotë ruse. "Bisedimet e Stambollit nuk janë për të arritur një paqe kompromisi sipas kushteve iluzive të dikujt tjetër, por për të siguruar fitoren tonë të shpejtë dhe shkatërrimin e plotë të regjimit neonazist", tha në Telegram zëvendëskryetari i Këshillit të Sigurisë së Rusisë. "Kjo është ajo për të cilën flet Memorandumi Rus i publikuar një ditë më parë", shtoi ai. Medvedev po i referohej një sërë kërkesash ruse që iu paraqitën Ukrainës në bisedimet në Stamboll të hënën. Ato përfshinin dorëzimin e më shumë territoreve, bërjen e Ukrainës një vend neutral, pranimin e kufizimeve në madhësinë e ushtrisë ukrainase dhe mbajtjen e zgjedhjeve të reja parlamentare dhe presidenciale. Në bisedimet, që zgjatën vetëm një orë, të dy palët ranë dakord për një shkëmbim të ri të të burgosurve të luftës dhe kthimin e 12,000 ushtarëve të vrarë, por jo për armëpushimin që Ukraina dhe aleatët e saj po i bëjnë presion Rusisë ta pranojë. Medvedev shtoi, në një përgjigje të dukshme ndaj sulmeve të fundjavës së Ukrainës mbi bazat strategjike të bombarduesve rusë, se Moska do të hakmerrej. "Hakmarrja është e pashmangshme", tha ai. "Ushtria jonë po ecën përpara dhe do të vazhdojë të përparojë. Çdo gjë që duhet të hidhet në erë do të hidhet në erë, dhe ata që duhet të eliminohen do të eleminohen", tha ai.