Rusia dhe Ukraina filluan një shkëmbim të madh të të burgosurve të premten, për të cilin u ra dakord në bisedimet e tyre të para të drejtpërdrejta në më shumë se tre vjet, tha të premten një burim ushtarak ukrainas. Presidenti amerikan Donald Trump, tha se shkëmbimi i të burgosurve ishte përfunduar tashmë, por Kievi dhe Moska nuk e konfirmuan këtë dhe burimi ushtarak tha se shkëmbimi ishte ende në proces. Rusia dhe Ukraina ranë dakord në dy orë bisedime në Stamboll javën e kaluar për të shkëmbyer 1,000 të burgosur, por nuk arritën të bien dakord për një armëpushim të propozuar nga Trump. Shkëmbimet e mëparshme të të burgosurve janë ndërmjetësuar nga Emiratet e Bashkuara Arabe. Shkëmbimi i të burgosurve ishte i vetmi hap konkret drejt paqes që të dy palët ranë dakord në bisedimet e tyre në Stamboll. "Urime të dyja palëve për këtë hap. Kjo mund të çojë në diçka të madhe???", tha Trump në një postim në Truth Social. Qindra mijëra ushtarë nga të dyja palët besohet se janë plagosur ose vrarë në luftën më vdekjeprurëse të Evropës që nga Lufta e Dytë Botërore, megjithëse asnjëra palë nuk publikon shifra të sakta të viktimave. Dhjetëra mijëra civilë ukrainas janë vrarë gjithashtu ndërsa forcat ruse kanë rrethuar dhe bombarduar qytetet ukrainase. Ukraina thotë se është gati për një armëpushim 30-ditor menjëherë, por Rusia, e cila e nisi luftën duke pushtuar fqinjin e saj në vitin 2022 dhe tani mban të pushtuar rreth një të pestën e Ukrainës, thotë se nuk do t'i ndalë sulmet e saj derisa të përmbushen kushtet e saj.