Një person është vrarë dhe dhjetë të tjerë, përfshirë dy fëmijë, janë plagosur në sulmin më të madh ajror që Rusia ka kryer në qytezën Lozova të Ukrainës që kur ka nisur lufta mbi tre vjet më parë, thanë zyrtarët. Sulmi masiv shkaktoi dëme në një stacion treni dhe në infrastrukturën tjetër në qytezën, që është qendër e transportit në rajonin e Harkivit, që gjendet në kufi me Rusinë, tha operatori shtetëror i hekurudhave në një njoftim. “Infrastruktura kritike, ndërtesa banimi dhe shtëpi janë dëmtuar... Lozova ka përjetuar sulmin më të madh që nga nisja e luftës”, tha kreu i Këshillit të qytetit, Serhiy Zelenskiy, përmes një postimi në Telegram. Ai shtoi se pjesë të rajonit kanë mbetur pa energji elektrike dhe ujë për shkak të sulmit rus. Kompania e hekurudhave tha se një nga punonjësit e saj vdiq dhe katër të tjerë u plagosën gjatë sulmit. Presidenti ukrainas, Volodymyr Zelensky, tha se Rusia ka goditur infrastrukturën civile në Lozova me më shumë se 25 dronë, duke dëmtuar një depo dhe një stacion. Ndërkaq, Forcat Ajrore të Ukrainës thanë se kanë rrëzuar 29 nga 46 dronët e lëshuar nga Rusia në gjithë vendin gjatë natës. Në njoftim u tha po ashtu se një raketë balistike dhe 17 dronë goditën shënjestra të ndryshme në Ukrainë. Por edhe rusia është shënjestruar nga ukraina, pasi një sulm me dronë gjatë natës shkaktoi disa zjarre, përfshirë një në nënstacionin elektrik në rajonin jugor rus të Rostovit. Zyrtarët lokalë thanë se nuk ka të lënduar si pasojë e sulmit. Njësitë mbrojtëse të rusisë shkatërruan gjithsej 24 dronë ukrainas gjatë natës, mes të cilëve shtatë mbi rajonin e Rostovit, që ka qenë shpesh objektiv i sulmeve të Kievit. Ministria ruse e mbrojtjes raporton vetëm numrin e dronëve ukrainas të rrëzuar dhe jo sa janë lëshuar.