Rusia dhe India theksuan angazhimin e tyre për një "partneritet strategjik" në bisedimet dypalëshe të sigurisë të zhvilluara në Moskë të enjten, një ditë pasi Presidenti amerikan Donald Trump njoftoi tarifa më të larta për importet nga India për shkak të blerjes së naftës ruse nga ana e saj. Agjencia e lajmeve Interfax citoi këshilltarin indian të sigurisë kombëtare Ajit Doval të thoshte se Neë Delhi mezi pret një vizitë nga Presidenti rus Vladimir Putin, deri në fund të vitit. Në takimin e Doval me Sergei Shoigu, sekretarin e Këshillit të Sigurisë së Rusisë, të dyja palët theksuan rëndësinë e marrëdhënieve mes dy vendeve. Vendosja e një tarife shtesë prej 25% për mallrat nga India, nga Trump, që hyn në fuqi më 28 gusht, sinjalizon dëmtimin më serioz në marrëdhëniet SHBA-Indi që nga kthimi i tij në detyrë në janar, duke kërcënuar të prishë aksesin e Indisë në tregun e saj më të madh të eksportit. India dhe Kina janë blerësit kryesorë të naftës së papërpunuar ruse të transportuar nga deti që kur Moska nisi pushtimin e saj të plotë të Ukrainës në shkurt 2022, duke përshpejtuar përpjekjet perëndimore për të mbytur ekonominë ruse. Trump kishte kërcënuar me masa kundër vendeve që blejnë naftë ruse përpara se të njoftonte tarifën e re për mallrat indiane, e cila e rriti totalin e detyrimeve në 50%. Të martën, Kremlini akuzoi Shtetet e Bashkuara se ushtronin presion të paligjshëm tregtar ndaj Neë Delhit, duke thënë se India ka të drejtë të bëjë tregti me këdo që ajo do.