Lëshimi testues i raketës ruse Angara-A5 nga kozmodromi Vostochny u anulua të mërkurën për herë të dytë këtë javë. "Urdhri për të anuluar nisjen është lëshuar," thuhej në një njoftim të bërë përmes altoparlantëve vetëm disa sekonda para nisjes në një kozmodrom në Lindjen e Largët të Rusisë. Nuk u bë e qartë menjëherë përse ndodhi kjo. Të martën, një problem me sistemin e presionit të raketës coi në anulimin e lëshimit në minutën e fundit. Dy lëshimet e anuluara janë një tjetër pengesë në një projekt që është shoqëruar nga vonesat në prodhim dhe çështjet teknike. Presidenti Vladimir Putin ka ambicie të mëdha për programin hapësinor të Rusisë, duke përfshirë ndërtimin e planifikuar të një stacioni të ri hapësinor rus deri në vitin 2027, dhe e ka përshkruar projektin Angara si shumë të rëndësishëm për sigurinë kombëtare. Lëshimi ishte caktuar të ishte i pari për këtë lloj rakete në kozmodromin e ri rus Vostochny, i vendosur në pyjet e rajonit Amur në Lindjen e Largët të Rusisë. Angara-A5 është 42.7 metra e gjatë dhe është e aftë të mbajë në orbitë ngarkesa më të mëdha se 20 tonë. Për shkak të vendndodhjes së tij më afër ekuatorit, Angara-A5 mund të dërgojë një ngarkesë më të rëndë në orbitë nëse niset nga Vostochny, vendi i parë dhe i vetëm i lëshimit të anijeve kozmike të rusisë pas sovjetike, sesa nga Plesetsk, një strukturë e epokës sovjetike ku ka pasur tre lëshime të suksesshme testuese të raketës Angara. Telashi më i fundit vjen pas dështimit të një misioni rus në hënë gushtin e kaluar, i pari i tij në 47 vjet, kur anija kozmike u rrëzua në Hënë.